Քննարկվել են Եվրասիական զարգացման բանկի հետ համագործակցության հարցերը

2018-06-11

1ՀՀ գյուղատնտեսության նախարար Արթուր Խաչատրյանն այսօր հյուրընկալել է  Եվրասիական զարգացման բանկի ներկայացուցչության տնօրեն  Արմեն  Մելկիկյանին։

 

Հանդիպման սկզբին նախարարն իր գոհունակությունն է հայտնել գյուղատնտեսության ոլորտում ԵԶԲ-ի հետաքրքրության կապակցությամբ։ Արմեն Մելկիկյանն իր հերթին  շնորհավորել է Արթուր Խաչատրյանին նշանակման առթիվ, մաղթել նրան արդյունավետ աշխատանք:

 

 Հանդիպմանը քննարկվել են գյուղատնտեսության ոլորտում երկկողմ գործակցության զարգացման հեռանկարները, նոր ուղղությունների շրջանակը։
Նախարար Խաչատրյանը կարևորել է ԵԶԲ-ի հետ սերտ և արդյունավետ համագործակցության հարթակի ստեղծումը՝ ոլորտի առաջնահերթությունների և զարգացման ծրագրերի իրականացման նպատակով։

 

Արմեն Մելկիկյանն ընդգծել է, որ բանկը  մեծապես հետաքրքրված է գյուղատնտեսության ոլորտում ծրագրերի ֆինանսավորման հարցում՝ մասնավորապես պետություն-մասնավոր հատված համագործակցության (PPP) ձևաչափով՝ ընդգծելով, որ արդեն նման ծրագիր է իրականացվում ջերմոցաշինության բնագավառում։

 

Նա նախարարին է ներկայացրել բանկի ֆինանսավորման պայմանները, ֆոնդերը,  գործող ծրագրերի ընթացքը և նախատեսվող նախաձեռնությունները։
Քննարկվել են նաև երկկողմ հետաքրքրություն ներկայացնող մի շարք այլ հարցեր։

 

 

ՀՀ գյուղատնտեսության նախարարության տեղեկատվության
և հասարակայնության հետ կապերի բաժին

Տպել